Majat e Ballkanit

Me qëllim krijimin e të ardhurave për banorët vendas, ndalimin e braktisjes së zonave malore të Kosovës, Malit të Zi dhe Shqipërisë dhe afrimin e këtyre pjesëve të rajonit, organizatat kombëtare dhe lokale të turizmit dhe klubet alpine bashkuan forcat me Bashkëpunimin Gjerman për Zhvillim për ta zhvilluar rajonin „Majat e Ballkanit” si një destinacion të vetëm të turizmit malor. Ndërtimi i një shtegu ndërkufitar për ecje, një nga të rrallët në botë, krijoi bazën e përbashkët për zhvillimin e mëtejshëm.

Shtegu ndërkufitar „Majat e Ballkanit” kalon nëpër një nga zonat malore më të largëta dhe më të egra të Ballkanit Perëndimor. Duke ndjekur shtigje barinjsh dhe këmbësorësh, rruga gjarpëron nëpër male të larta alpine deri në 2.300 metra mbi nivelin e detit, nëpër peizazhe mahnitëse – nga luginat e gjelbra te liqenet malore të kristalta, ujëvarat, lumenjtë dhe fshatrat e largëta piktoreske malore, ku duket sikur koha ka ndalur. Me një fjalë, një „thesar i fshehur” për adhuruesit e natyrës dhe ecësit malorë. Deri para njëzet vjetësh rajoni ishte pothuajse i paarritshëm për vizitorët, prandaj ecja nëpër malet e Shqipërisë, Kosovës dhe Malit të Zi është një përvojë autentike kulturore dhe aventurë.